O número de títulos dobrados ao galego que estreou a Televisión de Galicia no 2023 superou a cifra programada durante o ano anterior, cun total de 53 obras cinematográficas. As máis foron, como sempre, producións con lingua orixinal en inglés, pero tamén se contan sete títulos que parten do francés e un con orixe no alemán.
Neste ano, dobráronse versións contemporáneas de títulos clásicos como Os sete magníficos (2016) ou A sedución (2017), con traducións de Rosa Moledo. Destacan tamén éxitos da carteleira como Puñais polas costas (2019) ou Sicario (2015), cuxos textos galegos asina Manuel Arca; con todo, respecto do primeiro filme, é de lamentar que a emisión galega se producise ás 00:30 h do mércores 5 de xullo, en tanto a versión castelá se estrease en TVE o 11 de outubro, véspera de festivo, ás 22:35 h. Entre outras obras de interese tamén se incorporaron ao catálogo galego longametraxes como Queen & Slim (2019), con tradución de Magdalena Sánchez; A rapaza do tren (2016), traída por Adrián Ramos; e Os homes libres de Jones (2016), anosada por Rosa Camiña.
Se ata o de agora Netflix só dobrara producións destinadas ao público infanto-xuvenil, hai uns días estreou na súa plataforma os tráilers en galego da serie All The Light We Cannot See, o que converte esta obra no primeiro título para espectadores adultos que se estrea con dobraxe na lingua propia. Neste acontecemento tamén estarán presentes o catalán e o vasco, que alcanzan o mesmo fito, e que se integran ao pé dun total de quince pistas de audio confirmadas ata o momento.
All The Light We Cannot See, baseada no supervendas homónimo de Anthony Doerr gañador do Premio Pulitzer de Ficción no ano 2015, é unha serie protagonizada por Aria Mia Loberti, Louis Hofmann, Mark Ruffalo, Lars Eidinger, Hugh Laurie e Marion Bailey ambientada na segunda guerra mundial. As vidas de dous mozos, unha nena francesa cega e un xove soldado alemán, entrecrúzanse nunha carreira pola supervivencia contra o réxime nazi. Estrearase o 2 de novembro de 2023 e a propia Netflix indica na súa interface que a serie se recomenda a espectadores maiores de 16 anos.
O galego, presente entre as pistas de audio do tráiler da serie.
Xa temos expresado anteriormente o que supón este clase de acontecementos para a cultura propia. Por unha parte, as producións máis atractivas e contemporáneas do panorama actual encóntranse dispoñibles en galego no mesmo momento en que se estrean na lingua orixinal e amplían a oferta de obras no idioma de noso. Por outra parte, este fenómeno supón outorgar ao espazo sociocultural galego unha posición equivalente aos do alemán, húngaro, italiano ou polaco, entre outros; isto é, en diferentes latitudes desenvólvese un proceso de tradución e de dobraxe paralelo, en que as diferentes linguas adaptan cadanseus recursos estilísticos e expresivos ás necesidades comunicativas que imprimen os textos de orixe. É de celebrar que o galego estea presente neste tipo de producións audiovisuais que chegan ao gran público. Ao cabo, o galego, ou é cultura de masas, ou non poderá ser.
Addenda do 18 de outubro. A plataforma incorporou os tráilers da serie con audiodescrición ao galego, o que converte All The Light We Cannot See na primeira produción de Netflix en contar con narracións para persoas con discapacidade visual na lingua nosa.
DERRUBANDO ISOGLOSAS 